يوم الأربعاء الى طاف، راكبين السيارة انا و ابو العيال رايحين نقظي جم مشوار. الراديو شغال و مطوليين على مارينا اف ام و نسمع هالأغاني و مندمجين حدنا. خلصت الأغنية ... إلي بعدو ؟؟؟
الأغنيه الى رقصت عليها في عرسي. طالعني ابو العيال و على وجهه ابتسامة. ادري شنو بيقول، كل مرة ايقول نفس الحجوه.
ابو العيال: تذكرين يا ام فلان هالإغنية ؟
انا: اكيد اذكر، هذا شي ينسي بالله.
ابو العيال: ما تستحين ترقصين جدامي؟! ( ايقولها وهو يضحك)
انا: العرس حق العروس اذا ما استانست فية منو المفروض يستانس ؟
طرى على بالي سؤال ... ليش العروس ابعرسها لازم ما تستانس؟؟ ليش ممنوع عليها انها تظهر علامات الفرح و الوناسة ؟! اشفيها اذا قامت العروس ورقصت مع رفيجاتها و المعازيم ؟؟ ليش ينقال عن الي تستانس ابعرسها فصعة و بارع و ما تستحي ؟!! مافي شك ان الوحدة تكون مرتبكة و خايفة و تحاتي، بس هذا ما يمنع انها بعد تستانس. اليوم يومها. يا زيين الامريكان بهالسوالف. عقب مراسم الكنيسة ايي الاستقبال و تلاقي العروس ترقص و تغني و تستانس لين تقول بسسسسسسسسسسسس. اما عندنا هني اذا قاعدة يمة على الكوشة و سولفت معاه ولا تبوسمت وايد و ضحكت دزولها وحدة من اهلها:
احاجيييج، ايقولونليج لا تضحكيين وايد خلج ثقيلة. شفيج اتبوسمين جنج مو شايفة خير؟؟؟ وو بعدين بسكم هذرة انتي وياة بعدين ايصكونكم عين. و غيرة و غيرة من التعليقات الى اتييب اليهد.
شنو المشكلة اذا الوحده استانست ؟! بنية وو عروس و برقص مع رفيجاتي، ليش مايصير و عيب و قعدي على الكوشة 3 ساعات ونتي مستحية. انزين اول ساعة بستحي، ثاني ساعة، بعدين خلاص تعبت من القعدة !!! لي متى يعني ؟ الاوادم جدامي رايحة رادة ترقص مستانسة ابعرسي. انزين هم انا مستانسة على عرسي ليش مايصير ارقص؟؟؟ دام ان المعرس ما دش للحين و الموجوديين كلهم ايعزون علي ولا جان ما عزمتهم، فا شنو الغلط في الموضوع ؟
